O XXII Guísamo Folk Bergondo capital da música tradicional galega
A vixésimo segunda edición do Festival Guísamo Folk, organizado polo Concello de Bergondo, recupera o seu formato habitual e este sábado, 26 de agosto, volverá converter ao centenario Campo da Feira de Guísamo no epicentro e a capital da música tradicional galega.
Para esta ocasión o Guísamo Folk, unha cita musical xa arraigada na programación cultural da provincia e de Galicia, contará coas actuacións de Caamaño e Ameixeiras, Os do Fondo da Barra e Heredeiros da Crus. Os concertos comezarán ás 20 horas e antes, desde as 16 horas, levaranse a cabo diferentes talleres e actividades.
O Campo da Feira foi hoxe, luns 21 de agosto, o lugar elixido para realizar a presentación da vixésimo segunda edición do Festival Guísamo Folk, na que participaron a alcaldesa de Bergondo, Alejandra Pérez Máquez, a concelleira de Cultura, Patricia Vázquez, e a técnica encargada do Festival, Josefina Maestu.
Alejandra Pérez Máquez sinalou que “contamos con que este vai a ser un ano potente, a pesar de que coincide con outras festas e festivais na redonda, porque o Guísamo Folk xa é un festival que está totalmente consolidado”.
A alcaldesa explicou que “unha vez máis tentamos abarcar diferentes gustos musicais e que sexa un festival onde un poida vir a comer, estar pola tarde, e ver o primeiro dos grupos e marchar ou, pola contra, vir para a noite para gozar das últimas actuacións”. “Os grupos son moi distintos entre si, está feito á mantenta para tentar ter un festival máis aberto”, afirmou.
“Contamos con máis espazo para aparcamento, hai 22.000 metros cadrados dispoñibles”, indicou a rexedora, que quixo “darlle as grazas aos veciños e veciñas que sempre colaboran e tamén aos que este ano sumáronse cedendo as súas leiras, agardemos que o tempo acompañe e que desfrutemos, neste espazo idílico, dunha gran xornada de festa en familia”.
A música encherá o Campo da Feira
Como é habitual, a xornada do sábado 26 de agosto comezará coa comida campestre que todos os anos realizan os veciños nesta data. Seguirá cos talleres e xogos tradicionais durante a tarde e, unha vez empece a música, a festa non parará ata alcanzar a madrugada.
A primeira formación en subir ao escenario será Caamaño e Ameixeiras, que o farán ás 20:00 horas. Un dúo ligado á música e ao baile de raíz, formado por Sabela Caamaño (acordeón cromático) e Antía Ameixeiras (violín e voz) en 2018.
A partir das 22:00 horas está fixado o inicio do concerto que ofrecerán Os do Fondo da Barra, unha banda que nace do grupo de cantareiros de Xacarandaina, asociación constituída no ano 1978 para a investigación do folclore galego.
Heredeiros da Crus pechará o festival a partir das 00:00 horas. Este grupo leva escribindo a historia do rock en galego desde hai 30 anos. No 2022 arrincaron a xira 30 aniversario, unha gran oportunidade para gozar da súa música en estado puro.
Talleres, xogos e comida campestre
O Festival Guísamo Folk é máis que música. A festa iníciase todos os anos á hora de comer cando o Campo da Feira situado en Pedras Brancas acolle aos bergondeses que se reúnen para realizar unha tradicional comida campestre. As mesas de pedra poderán reservarse desde o xoves 24 no propio campo. Ademais, o Concello poñerá a maiores máis mesas portátiles.
Pola tarde haberá xogos tradicionais e tres obradoiros, de monicreques de calcetín, de barquiños con elementos naturais e de pintura de dedos. Estas actividades estarán dispoñibles desde as 16:00 horas. No Campo da Feira tamén terán os seus postos de comida e bebida as entidades do municipio; Comisión de Festas de Guísamo, ANPA As Mariñas do CPI Cruz do Sar e Club Ciclista Skapaos; e as empresas Mico-Midas Food Truck e Bico de Xeado.
