O espazo está pensado  pensado para satisfacer as necesidades culturais, deportivas e de lecer da veciñanza. Este equipamento público converteuse nun punto de encontro imprescindible para todas as idades, combinando funcionalidade e comodidade baixo un mesmo teito.

O centro integra varias instalacións clave:

  • Fondo infantil e bebeteca: Un espazo acolledor para a lectura, o estudo e a investigación, con fondos bibliográficos actualizados e zonas de traballo confortables.
  • Ximnasio: Dotado con equipamento moderno para a práctica de exercicio físico e o mantemento da saúde.
  • Auditorio/Salón de Actos: Unha sala polivalente con capacidade para acoller representacións teatrais, proxeccións cinematográficas, conferencias e outros eventos culturais.
  • Aula de Informática: Con postos equipados para formación dixital e acceso ás novas tecnoloxías.

O recinto tamén conta con:

  • Pista de atletismo 160 m con 5 beiravías, acompañada por gradas con capacidade para 490 persoas

  • Pista polideportiva con céspede artificial para prácticas deportivas variadas

  • Zona de calistenia para exercicios de forza e tonificación física ao aire libre

  • Auditorio ao aire libre con capacidade para 300 persoas, pensado para actos, espectáculos e actividades comunitarias

  • Parque infantil e circuito de equilibrio

  • Mesas de pícnic e aparcadoiro de bicicletas

Historia

En 1924, un grupo de emigrantes galegos orixinarios de Bergondo e residentes en Nova York acordaron constituír unha Asociación que se denominou “Centro de Instrucción y recreo de Bergondo y sus contornos”. Esta Asociación rexistrada no Goberno Civil o 17 de decembro de 1926 co propósito do cumprimento dos seus obxectivos de carácter instrutivo, cultural e deportivo, adquiriron a finca denominada “A Senra” de 9.135 m2. Posteriormente, coas achegas económicas dos seus socios e a colaboración desinteresada de moitos bergondeses, levantouse unha edificación dotada de semisoto de 260 m2, baixo de 669 m2 e primeira planta de 408 m2, complexo este que foi inaugurado o día 12 de Xullo de 1936.
Trala sublevación militar contra a República o 18 de Xullo de 1936, o complexo foi ocupado por tropas militares franquistas, segundo consta nas actas da Sociedade de 4 de agosto e 12 de setembro de 1936. Seguidamente abriuse un expediente pola Comisión Central de Bens Incautados e por decreto de 14 de xullo de 1937, acordouse a incautación do edificio e terreos anexos, e a súa ocupación como propiedade do estado, con fundamento no decreto núm. 108 da Xunta de Defensa Nacional de 13 de novembro de 1936, e como consecuencia de todo isto, tal e como figura na certificación rexistral, a Xefatura Superior Administrativa de Responsabilidades Políticas acordou que se inscribise o inmoble e terreos indicados no rexistro da Propiedade a favor do Estado, interesándose inscrición de dominio , e como tal figuraba no Tomo 961, Inscrición 1ª e única do Rexistro da Propiedade de Betanzos.

Rematada a Guerra Civil, e segundo O.M. de 7 de novembro de 1944, decídese a súa adscrición ó Ministerio de Educación, quen á súa vez o adscribe á Universidade de Santiago, segundo consta na acta asinada polo reitor con data 5 de febreiro de 1945, que o destina a Albergue Universitario dependente do SEU.

Durante os anos 50 e 60, funcionou como Albergue, no que se desenvolvían actividades propias das Organizacións do Réxime, SEU e Falanxe. A partir dos anos 70  e ata o ano 2000, tanto dende os exiliados e emigrados bergondeses en Nova York como dende o Concello de Bergondo fixéronse tódalas xestións posibles diante dos sucesivos Gobernos do Estado reclamando a devolución dun Patrimonio de gran transcendencia social e histórica para Bergondo inxustamente incautado durante a Guerra Civil. No ano 2001, data na que foi finalmente cedido ó Concello de Bergondo pola Dirección Xeral de Patrimonio do Estado.

Finalmente, no 2000, o inmoble “ A Senra” foi cedido pola Dirección Xeral de Patrimonio do Estado ó  Concello de Bergondo, co compromiso da súa reconstrución e conversión nun Centro Sociocultural.